រាជធានីភ្នំពេញ ៖ ជនសង្ស័យម្នាក់ ត្រូវបានសមត្ថកិច្ចធ្វើការឃាត់ខ្លួន ពាក់ព័ន្ធករណី ជួញដូរ​ដោយខុសច្បាប់នូវសារធាតុញៀន​(ម៉ាទឹកកក​)​ និងប្រើប្រាស់អាវុធខុសច្បាប់​ កាលពីវេលាម៉ោង ៣និង ៣០នាទីរសៀល ថ្ងៃទី១៩ ខែ​ វិច្ឆិកា​​ ឆ្នាំ២០២៤​ ត្រង់ចំណុចផ្លូវបេតុង​ ភូមិត្រពាំងត្រាច​ ឃុំដំណាក់អំពិល​ ស្រុកអង្គស្នួល​ ខេត្ត​កណ្ដាល​ ។

សមត្ថកិច្ចបានឲ្យដឹងថា ជនសង្ស័យមានឈ្មោះ ឆាំ​ អុល​ ភេទប្រុស​ អាយុ​៣១ឆ្នាំ មុខរបរ​មិនពិត​ រស់នៅ​ភូមិព្រៃសាលា​ ឃុំរលាំងគ្រើល​ ស្រុកសំរោងទង​ ខេត្ត​កំពង់ស្ពឺ​ ។

ក្នុងនោះ វត្ថុតាងដកហូតរួមមាន ៖

-ម្សៅក្រាមសថ្លាសង្ស័យសារធាតុញៀន​(ម៉ាទឹកកក)​ ០៥កញ្ចប់​ (ធំ០២កញ្ចប់​ ,មធ្យម០៣កញ្ចប់)​ ទម្ងន់​ ២២៣,៨ក្រាម

-អាវុធខ្លី០១ដេីម​ ម៉ាកK54 (បង់០១​ ,គ្រាប់០៦គ្រាប់)

-រថយន្ត០១គ្រឿង​ ម៉ាកToyota Prius សេរីឆ្នាំ២០១២​ ពណ៌​ទឹកប្រាក់​ ពាក់ផ្លាកលេខភ្នំពេញ2BF.4636 (គ្មានឯកសារ)

-ជញ្ជីងថ្លឹងថ្នាំញៀន០១

-លុយខ្មែរ​ ៤លានរៀល

-ទូរសព្ទ​ដៃ១គ្រឿង​ ម៉ាកoppo (ពណ៌ស-ផ្ទៃមេឃ)

-ឧបករណ៍​ប្រើប្រាស់​ វេចខ្ចប់​ថ្នាំ​ញៀន​មួយចំនួន​។

សូមបញ្ជាក់ថា មុនពេលកើតហេតុ កម្លាំងផ្នែកនគរបាលប្រឆាំងគ្រឿងញៀន​ស្រុក​ បានទទួលព័ត៌មាន​ពីមហាជន​ល្អ​ថាមានមុខសញ្ញាជួញដូរដោយខុសច្បាប់នូវសារធាតុញៀន​ នៅចំណុចកើតហេតុ​ ។ ក្រោយពីទទួលបានព័ត៌មាន​បានភ្លាម​ ដោយមានបទបញ្ជាពី​លោកឧត្តមសេនីយ៍ទោ​ ឈឿន​ សុចិត្ត​ ស្នងការនគរបាលខេត្តកណ្តាល​ ដឹកនាំបញ្ជាផ្ទាល់ដោយលោកអធិការនគរបាលស្រុក​អង្គស្នួល​ កម្លាំងផ្នែកជំនាញ​ សហការជាមួយកម្លាំងប៉ុស្តិ៍នគរបាលរដ្ឋបាល​ ដំណាក់អំពិល​ សំរោងលើពើក​ បានចុះទៅដល់កន្លែងកើតហេតុ​ បង្ក្រាបឃាត់ខ្លួន​ជនសង្ស័យ​បានម្នាក់ ដកហូតវត្ថុតាងដូចខាងលើ​ រួចបញ្ជូនមកកាន់អធិការដ្ឋាននគរបាលស្រុក​ ដើម្បីបន្តនីតិវិធី។

នៅចំពោះមុខសមត្ថកិច្ច​ ជនសង្ស័យ​បានឆ្លើយសារភាពថា​ ថ្នាំញៀនម៉ាទឹកកក​ខាលើ ទិញពីមុខសញ្ញាឈ្មោះ​ ធី​ ភេទប្រុស​ អាយុ​ប្រហែល​៣៧ឆ្នាំ​ មុខរបរ​មិនពិត​ រស់នៅ​ខេត្ត​កំពង់ស្ពឺ​ ក្នុងតម្លៃពីរលានរៀល​ ដើម្បីលក់បន្ត។

ជនសង្ស័យ រួមជាមួយវត្ថុតាង ត្រូវបានបញ្ជូនមកកាន់អធិការដ្ឋាននគរបាលស្រុក ដើម្បីសាកសួរបន្ត និងកសាងសំណុំរឿងចាត់ការតាមនីតិវិធី ៕ មេសា